معروف قوى لاى حد فى القاهره او اسكندريه او مصر عموما يعنى انه الشوارع واقفه خميس و جمعه و زحمه باقى الايام و دا طبعا حاجه مش كويسه لانه بيسبب اضرار كتير للناس بطريقه مش مباشره و مش غريب علينا لما حامل متلحقش تروح المستشفى و العسكرى الميرى يولدها فى الميدان ! و الحكومه تديله مكافئه شجاعه و بطوله 13 جنيه و تلاتين قرش , عموما يعنى المشاكل بتحصل بسبب الزحمه زى التأخر على الشغل و الدرسه و كده
هو لو كان على التأخير كان هنعديها لكن المشكله انه المديره او المدرسين او الناس الى بتروحلهم متأخر بيعتبروا انك انتا الى كسلان و هما عارفين انه السبب فى الشوارع الزحمه مش فيك بس تقول ايه و تفهم مين! المهم و طبعا ميخفاش على اى اعمى او مفتح او اعمى و عامل نفسه مفتح! اننا بلد المرور بتاعها فى الضياع و الاجانب بيعتبروها من عجايب الدنيا و صدق الى قال انه الى بنى مصر حلوانى عايز تتاكد بص الشوارع عامله ازاى
المشكله هنا فين؟؟ من وجهه نظر الحكومه انه السبب هو العربيات الزياده فى الشوارع! و للاسف ناس كتير مصدقه النكته دى و عمر ما حد فكر انه الشوارع هى الى صغيره على العربيات على الرغم اننا حسب التقارير الدوليه من الدول الى العربيات فيها قليله بالنسبه للسكان 30 عربيه لكل الف واحد و فى بلاد تانيه زى اليابان 500 عربيه لكل الف واحد و امريكا 300 عربيه لكل واحد و طبعا مش محتاج اقول انه الخليج العربيات اكتر من الناس
قبل ما اكمل الموضوع هيطلع واحد انا عارفه او كتير يقولى طب انتا بتتكلم عن البلاد الغنيه متقارن بالبلاد الى زينا الصومال و لا موزمبيق و لا اى فقيره تانيه !!! ازاى نقارن بين مصر و البلاد الفقيره بلد فيها علماء زى مصر و سينما زى المصريه و النيل و البترول و الغاز و المعادن الغاليه و السياحه و الجغرافيا و التاريخ و الحياء كمان !! تبقى فقيره ! عموما كنت عايز اوضح اننا مش فقرا بس فمينفعش نقارن نفسنا بناس معندهمش حاجه غير صحرا او شويه غابات
نلاحظ انه المدن بقت زحمه بطريقه مرعبه و العربيات بقت تتحرك بنفس سرعه الراجل الى ماشى و عموما سبب المشكله دى اتنين بس الحكومه و الشعب لكن الاولى هى السبب الرئيسى الشعب هو السبب لانه مش بيفكر صح تلاقى الحاره يدروب تكفى حمار يعى و صاحب الارض يهد البيت و يطلع برج عشر ادوار لا و ايه الناس بتدفع فلوسها فى الهبل دا و الحكومه ساكته على ده و بعد كده الناس تليص فى بعض من زحمه الشوارع و تنسى الحكومه
الحكومه حلت المشكله من وجهه نظرها و بالطريقه الاحسن ليها
رافعه الضرايب على العربيات و بتدعى انه العربيات كتير على الشوارع عشان تتهرب من واجبها فى تمديد طرق جديده و مدن جديده تستوعب الزياده بجانب مفهوم خاطىء عندنا اننا بنسكن فى عمارات!!! ايه يعنى السكن فى عماره حاجه غلط؟؟؟ هى مش غلط قوى بس تكون فى حدود المعقول
مهو لما كلنا نتكربس فوق بعض فى نفس الشارع هتبقى زحمه انما لو كل بيت فى دور واحد هنتوسع و هنسيب مساحه فاضيه كبيره و بكده مش هيبقى عندنا زحمه بس الشعب مش بيفكر فى كده و لا الحكومه فارق معاها مدام هيا عايش فى الفلل و القصور الى مفيهاش زحمه
يبقى الحل لمشكله الزحمه اننا نسكن فى بيوت دور و كتيره قوى اتنين و نتوسع بمساحه كبيره مش شرط مدن جديده فى مدينه لوس انجلوس فى كاليفورنيا المدينه فيها 10 مليون امريكى يعنى نص سكان القاهره بس على مساحه قد القاهره خمس او ست مرات
فى الحاله دى الحكومه معندهاش عذر انها تزود الضرايب على العربيات مهى بكده مش هيبقى فى زحمه و لا ايه؟
حد معترض على الكلام؟؟
طب حد فاهم الكلام اصلا؟
